Denne veka har vore skikkeleg kald i Caen, ned mot 9 kuldegrader om natta og såvidt opp mot null om dagen. Men me har ikkje hatt sno! De har kan hende sett nyhetsinnslag heime med kaos i Paris og Marseille t.d.. Både motorvegar og skular blei visst stengt mens det stod på som verst. Hybelen min er iskald, teljos hjelper faktisk for å få det litt lunt. Om temperaturen kjem opp i ca. 20 grader i bordhøgde, er det likevel 14 grader på golvet.
I dag hadde det snudd om litt, så i ca. 5 grader og fin sol tok eg ein sykkeltur eit par timar i området - flott.
Sist sundag tok eg berre ein rusletur i Rosariet, den flotte parken like ved, og legg ved nokre bilete av korleis den tok seg ut i ca. minus fem. Endene kjempa ein hard kamp for å halde ein del av dammen sin open, stemorsblomane, som blei planta ut i november, hang med nebbet og i Rosariet var det ikkje mange roser å sjå. Fleire stiar var avstengde med skilt om å vera varsam pga. is!
Den fuktige lufta her gjer at dei kjennest mykje kaldare enn heime. Men jammen kom det ikkje ein joggar i berre stuttbukse! Fredag var eg på joggetur i same området (med langbukse) i solskin; jommen hadde ikkje stemorsblomane friskna til att, endå det har vore fleire minusgrader heile veka!
Ingen kommentarer:
Legg inn en kommentar