Dei 4 S-ane

Studiedag i dag. Starta optimistisk med sterke verb. No er det ingen bøn meir; klar melding frå Francine om at me kjem til å bli høyrd i somme av dei mest sentrale sterke verba på onsdag. Verb er jo i seg sjølv ei sann plage på fransk, dei har vel minst dobbelt så mange tider som me har, og ulik bøying for alle personar. Døme: å ha i presens på norsk: eg/du/han-ho/vi/de/dei har. Det greier me oss heilt utmerka med. Franskmennane derimot ( i same rekkjefylgje): j'avais, tu as, il-elle a, nous avons, vous avez, ils ont. Som om ikkje det er nok, så er det somme lydar som skal uttalast, andre ikkje.
Eg har kjøpt ei eiga lita bok på ca 200 sider som heiter la conjugaison, og berre handlar om bøying av verb. På fargen liknar boka på Mao's lille raude, men innhaldet er vel meir som den lille katekismen.
Biblen med stor B heiter le petit Robert (synonymordbok) og finst i alle storleikar. I butikkane har dei utgåver ungane tek til å bruke på eit tidleg tidpunkt på skulen. Den største utgåva er visst kjempediger. Vår er "berre" på 60ooo ord/ca. 3000 sider og kan brukast til styrketrening, om ikkje anna. Eg prøvde meg på eit reknestykke om kor mange sider eg måtte lese per dag for å koma gjennom dette året, men fann ut at det er heilt umogeleg. Men Francine, fonologilæraren vår, uttalte begeistra at ho elskar den boka. Då må ho vera god - Francine har nemleg god smak; ho er eigentleg busett i Kristiansand. Eg trur forresten eg veit kven ho var gift med før, men det er ei anna sak. Får heller koma tilbake til det når eg evt. har fått stadfesta det.
Shopping var den neste s-en. Drog til byen, (skulle kjøpe geografibok), havna på H&M, traff nokre av ungjentene på studiet der. Billig og bra. I det heile tatt er det absolutt mogleg å få tak i mykje billig her, men eg forvilla meg og inn i eit par sjapper som eg berre lista meg fort ut av. Vel heime att blei det
Sykkeltur. Ikkje så lang, riktig nok, for det begynte å bli seint, og er har ikkje lykt på sykkelen! Men det blei over 45 min. så eg kan skrive det opp på aktivitetskalenderen til kommunen! (I går var eg på joggetur, med styrkeøkt etterpå, enda eg hadde gått att og fram til skulen (1 t.) Det var forresten fæl trafikk der eg sykla, så neste gong eg skal på tur, skal eg rådføre meg meg Michelin sin reiseplanleggjar, dei har fin info for syklistar og fotgjengarar. Siste s'en var
Statens lånekasse, som ikkje lenger er avgrensa til studerande ungdom, som det heitte før i tida. Og bra er det, for no driv eg og tar opp att kontakten med noko eg ikkje trudde eg skulle ha meir med å gjera. Eg hadde søkt på eit legat som eg vel hadde rekna med å få nokre tusenlappar frå, men den gong ei. Trur alle dei andre her har fått, men ikkje eg. Einaste forskjellen på meg og dei er at eg er gift. Og så trur dei fine Bærumsfuene som er med i styret for legatet at det er slik at ein er forsørga fordi om ein er gift! I 2008! (Eg skal sende ein sur mail til dei). Dei andre kan jo leige ut leilighetane/husa sine medan dei er borte. Eg kan vel ikkje akkurat hive ut Svein, eller?
Så då må eg altså gjenoppta kontakten med Lånekassa, som no skal forsørge både gamlemor og 4 skrikarungar dette året (godt ein ikkje har fleire).
Men fint ver har me. Det er litt under 10 grader om natta nå, men opp mot 20 om dagen og mykje både sol og vind, som kjennest kald innimellom. Tre og buskar tek til å skifte farge, så det er nok haust her og. Kjøpte meg forresten ny dyne her om dagen, for då var eg lei av å fryse om nettene. Nei, dette teppesystemet skal franskmenn få ha i fred for meg!