Flystripe

Så har eg fått svar på kva minnesmerket nedanfor er for. Det er ein takk til dei nordmenn som var med på å byggje ei flystripe mellom Caen og kysten, i samband med D-dagen. Skal prøve å finne ut meir om det seinare.
Ei ny veke er nesten over. Dvs. ordinær undervisning på universitetsområdet, der det no kryr av folk. Dei franske studentane er tilbake for fullt, noko som tyder lange køer i matpausa (godt ho er på 11/2 time), men det er mat nok til alle. I den eine kantina må det vera fleire hundre på same tid, den andre er litt mindre. Det går rimeleg fort unna, og er greit organisert. Ein fiskekø, ein salatkø, ein pizzakø osv. På kvar "stand" kan du velje mellom ulikt tilbehør. Grønsakene er som regel ihelkoka, risen likeså. Elles er det nokre diskar der du kan forsyne deg meg ulike typar salat, råkost, patéar o.l. Så er det det ein helst skal gå forbi: store diskar med ulike dessertar og kaker. Alt er ikkje på langt nær så godt som det ser ut til, men det veit ein jo ikkje utan å smake... Men smakar ein på slikt kvar dag, vil vel det få sine konsekvensar, så eg prøver stort sett å gå forbi.
Etter dette gedigne måltidet, som kostar ca 3€, dvs ca. 25 kr., har me eit fast lite rituale med ein skikkeleg god kaffekopp (café longue) i ein kaffebar like ved, som heiter Oksygen, av alle ting. Deretter er me eigentleg berre klare for ein ting, nemleg ein liten middagskvil. Men den gang ei... Då er det i gang med ny økt, som i dag varte til rundt halv fem, fordi me måtte leite etter ledig lokale. Som sagt, her er overfylt med studentar (ca 25000, fordelt på 2 campus-område), så livet er ein kamp innimellom, i alle fall for lærararne, som når dei endeleg har funne eit lokale, så virkar ikkje ditt, og så manglar datt.
Men Francine fekk no losa oss gjennom fonologi-økta i ettermiddag i fullt driv likevel, som vanleg. I tillegg hadde me ei runde med informasjon om morgodagen. Då skal me på ein ny, stor ekskursjon. Denne gongen til strendene i Normandie, som var åstaden for D-dagen. Men det kjem eg tilbake til etter den turen. Me har med oss dyktige guider, bl.a Francine, som sjølv om ho har vokse opp i området, og har gjennomført slike opplegg mangfoldige gonger før, likevel fekk problem med å leggje fram stoffet for oss i dag. Det er fortsatt eit kjenslelada tema for folk her, og truleg også for dei fleste av oss norske. Så det skal nok bli ein tøff dag i morgon. Då er det ikkje uveret som er meldt, som eg tenkjer på.
No skal eg slappe av litt, før eg skal lese meg opp på det som skal skje i morgo. Har informasjon både på fransk, norsk og engelsk, ikkje rart ein har vanskar med å sova om natta.
Men eg treng heldigvis ikkje bruke tid på å lage middag. Dei dagane me er på Universitet og et dejeuner, er det ikkje nødvendig å lage middag om kvelden! Og i morgo skal me få Quiche Lorraine:)
Er forresten i rimeleg bra form att, etter influensaen sist helg. Var borte frå skulen på måndagen, og stod over fyrste treningsøkt eg skulle vore med på her: Energym på tysdagene. I morgo går eg glipp av musculation, som eg har meldt meg på på fredagane, pga. turen. (styrketrening, altså). Men eg får koma sterkare tilbake seinare!